Xa está en marcha a nova edición do concurso de turismo escolar da provincia da Coruña

Por segundo ano consecutivo, a Deputación da Coruña convoca unha nova edición do concurso de “turismo escolar”, dirixido a todos os escolares de entre 3 e 16 anos dos centros educativos da provincia da Coruña
martes, 6 Marzo, 2018

A Deputación da Coruña conta dende fai uns anos cun programa de visitas para os escolares aos recursos da provincia da Coruña, co fin de incentivar o coñecemento do patrimonio artístico, histórico e natural entre o alumnado dos centros de ensino da provincia, e á vez, que o alumnado sexa partícipe nesas visitas, que lles deixen pegada, xurdindo así a idea do concurso.

Que hai que facer para poder participar? Tan só ter realizado algunha visita a algún dos lugares descritos no programa de  turismo escolar da Deputación da Coruña.

Os traballos que se presenten deberán versar sobre a visita turística realizada dentro do programa, e poderán presentarse en diferentes formatos: debuxos e traballos creativos (redaccións, collages, relatos ilustrados, etc). O Museo etnográfico da Capela, o castelo de Moeche, o Museo do Mar de Laxe, o Museo do Humor de Fene, o Muíño de mareas de Muros, a Casa Museo de Manuel Antonio ou a horta de froitas autóctonas en San Sadurniño son algúns dos setenta recursos históricos, patrimoniais e naturais que o catálogo de Turismo Escolar que lles ofrece aos distintos centros de ensino da provincia.

Hai fantásticos premios para os alumnos e os colexios gañadores. Non deixedes pasar esta oportunidade. Tendes ata o 30 de xuño de 2018 para presentarvos!

Podedes consultar toda a información sobre o programa no seguinte enlace, e as bases para o concurso deste ano aquí.