XXVIII Feira do Mel

O concello de Oleiros celebra o domingo 5 de novembro a XXVIII edición da Feira do Mel. Como cada ano, á feira asistirá unha selección dos mellores apicultores galegos e españois que virán ó municipio a expoñer e vender os seus produtos. As persoas que se acheguen, poderán coñecer e adquirir todo tipo de alimentos e artigos relacionados co mel, desde os máis tradicionais ata os cosméticos, nos máis de 30 postos habilitados para tal fin.

Ademais, este ano poderá degustarse, de maneira gratuíta, aceite virxe extra e produtos típicos do concello de Porcuna (Jaén), invitado especial á Feira do Mel.

O recinto abrirá as súas portas ás 10:00 horas e pechará contra as 21:00 horas. A carpa na que terá lugar o evento, acollerá actuacións de grupos de música e baile popular galego do municipio que animarán a feira durante todo o día. Pola tarde, a partir das 16:30 horas, realizaranse actividades de animación infantil dirixidas aos máis cativos. Para pechar haberá magosto e queimada amenizada pola orquestra Trébol.