Que está a pasar?

A Deputación da Coruña participa un ano máis en B-Travel, a feira internacional de turismo que se celebra en Barcelona do 20 ao 22 de marzo. Coma en edicións anteriores, a Área de Turismo da institución, que dirixe Xosé Regueira, levará a este foro a súa aposta polo turismo industrial como un dos eixos estratéxicos da súa oferta turística.

No marco do espazo B-Industrial, unha área temática especializada en turismo industrial dentro do salón, a Deputación presentará o sábado, día 21, a proposta titulada ‘Historia da conserva na provincia da Coruña’, centrada na posta en valor do patrimonio industrial e gastronómico vinculado ao sector conserveiro.

O vicepresidente da Deputación e deputado de Tuirsmo, Xosé Regueira, subliña que as políticas provinciais se deben orientar a «fortalecer os sectores produtivos» e a «construír experiencias auténticas baseadas na identidade galega». Neste senso, reivindica o potencial do rural «como espazo estratéxico e cheo de vitalidade, capaz de ofrecer experiencias verdadeiras ao tempo que se preservan os valores propios».

Unha industria con arraigo no territorio

A presentación da Deputación da Coruña afonda na tradición conserveira da provincia, especialmente en territorios como Barbanza Arousa, onde esta industria contribuíu a conformar a paisaxe, a economía e a identidade social. A proposta pon o foco na calidade dos produtos do mar, tanto frescos como en conserva, e na súa vinculación coa cultura local, así como na maridaxe cos viños da Indicación Xeográfica Protexida Terras do Barbanza e Iria.

Neste sentido, a Deputación dá continuidade á estratexia de promoción do turismo industrial e enogastronómico que levou ás anteriores edicións desta feira; neste caso, impulsando experiencias que permiten coñecer tanto o pasado como o presente da industria conserveira e vitivinícola, a través de visitas a instalacións, degustacións e propostas que conectan o patrimonio co turismo experiencial.

A participación da Deputación neste evento responde ao obxectivo de consolidar o turismo industrial e gastronómico como un dos piares da súa estratexia turística, promovendo a provincia como un destino singular baseado na autenticidade, na identidade propia e na calidade das súas experiencias.

O vicepresidente e deputado de Turismo da Deputación da Coruña, Xosé Regueira, participou esta mañá en Cabana de Bergantiños na presentación do Manual de Miradoiros Starlight, elaborado pola Asociación de Astroturismo da Costa da Morte. O acto, que tivo lugar no Centro Arqueolóxico Dolmen de Dombate, contou como anfitrión co alcalde, José Muíño.

Tras unhas palabras do rexedor, interveu Ada González, membro da directiva da Asociación de Astroturismo da Costa da Morte. Segundo explicou, este manual é un documento de consulta sobre o astroturismo e, en particular, sobre os miradoiros estelares.

A publicación aborda as características que deben reunir estes espazos para a observación do ceo nocturno e inclúe recomendacións sobre a sinalización que se aconsella empregar para garantir a uniformidade dos miradoiros estelares.

Na súa quenda, Regueira subliñou que o turismo debe entenderse tamén como unha actividade económica que xera oportunidades no territorio e que require dunha estrutura profesional e empresarial ao seu redorl. O vicepresidente da Deputación explicou que o obxectivo das políticas turísticas da institución é contribuír a consolidar esa estrutura e favorecer que o retorno económico quede nas comarcas que reciben visitantes.

«Cando falamos de turismo falamos de negocio. Nós estamos tamén para darlles servizo ás persoas que viven do turismo: hostalaría, hoteleiros, persoal técnico...», afirmou.

Regueira destacou tamén o potencial do astroturismo como un subsector con capacidade para xerar actividade económica no territorio. Neste sentido, lembrou que a Deputación está a impulsar iniciativas de formación, como a capacitación de guías Starlight, co obxectivo de estruturar unha oferta turística ao redor da observación do ceo nocturno. «O turismo implica negocio e retorno económico no territorio e, sobre todo, oportunidades polo territorio», sinalou.

Durante a súa intervención, o vicepresidente incidiu tamén na importancia de que o selo Starlight se traduza en iniciativas concretas que melloren tanto a experiencia turística como a protección do ceo nocturno. Ao respecto, puxo en valor o traballo da Asociación de Astroturismo da Costa da Morte e destacou a súa contribución á planificación das políticas públicas neste ámbito.

Segundo explicou, a participación da entidade en FITUR —acompañando a Deputación da Coruña— e as reflexións expostas polo colectivo levaron Área de Turismo provincial a reorientar a súa estratexia con motivo da eclipse total de sol prevista para o 12 de agosto. A institución provincial decidiu priorizar accións de sensibilización e seguridade no territorio ante a previsión de grande afluencia de persoas visitantes.

A Deputación da Coruña participou este luns no acto de entrega de premios do XVII Santiago(é)Tapas, celebrado na Sala Mozart do Auditorio de Galiza, no que se recoñeceu o talento e a creatividade dos establecementos participantes nun certame consolidado como unha das grandes citas gastronómicas da cidade. O vicepresidente da Deputación e responsábel da área de Turismo, Xosé Regueira, participou no acto institucional do concurso, que organiza Turismo de Santiago e no que a Deputación da Coruña é principal colaboradora. Na súa intervención, destacou o valor estratéxico dunha iniciativa que contribúe a dinamizar o sector hostaleiro e a reforzar a proxección gastronómica do territorio.

Regueira subliñou que Santiago(é)Tapas é «un evento cun gran valor estratéxico, que leva anos demostrando que a gastronomía é unha das mellores portas de entrada para descubrir o territorio». Neste sentido, sinalou que o certame «non só dinamiza o sector hostaleiro nun mes clave, senón que tamén proxecta a imaxe de Santiago como un destino gastronómico de vangarda e calidade e serve de plataforma para exhibir o enorme talento que temos nos fogóns do noso territorio».

O vicepresidente provincial puxo tamén en valor a tapa como formato culinario capaz de expresar a excelencia da gastronomía galega. «Temos que reivindicar a tapa non é un produto menor; todo o contrario, pode ser tamén unha expresión da alta cociña coa que poñer en valor o produto de proximidade e toda a cadea enogastronómica que hai detrás», subliñou.

Premio Deputación á ‘Mellor tapa creativa’

A principal novidade desta edición foi que o galardón principal do certame incorporou por primeira vez o nome da institución provincial. Por este motivo, a alcaldesa de Santiago chamou ao vicepresidente provincial ao escenario para facer entrega conxunta do Premio Deputación da Coruña á ‘Mellor tapa creativa’, no transcurso do acto celebrado no Auditorio de Galiza.

O concurso confirmou nesta edición o seu éxito de participación e consumo, superando as 33 000 tapas vendidas, un 10 % máis ca no ano anterior e por riba das máis de 30 000 rexistradas en 2025 e das 25 000 contabilizadas en 2024. Estes datos reafirman o papel do evento como unha ferramenta eficaz para fomentar o consumo durante a temporada baixa e avanzar cara a un modelo turístico máis desestacionalizado.

O vicepresidente da Deputación da Coruña, Xosé Regueira, e a deputada de Plans Provinciais, Cristina García Rey, visitaron esta mañá a VIII Feira do Queixo de Moeche coincidindo coa apertura da xornada do domingo no recinto feiral da localidade. Realizaron un percorrido polos postos do Mercado da Deputación instalados na feira, un espazo que reúne produtoras e produtores da provincia e que forma parte das accións de promoción do sector agroalimentario impulsadas pola institución provincial. A presenza deste mercado súmase ao apoio que a Deputación leva prestando ao evento ao longo dos anos.

No marco da programación da feira, Regueira e García —concelleira de Desenvolvemento Local na localidade— asistiron tamén ao primeiro dos tres pases do showcooking do chef André Arzúa, ás 11:30 horas. O cociñeiro preparou lingote de galiña piñeira recheo de queixo de Moeche co seu caldo; así como unha mousse de queixo de Moeche, mel e améndoa caramelizada.

O vicepresidente destacou o valor da feira como exemplo da capacidade de dinamización que poden xerar iniciativas impulsadas desde concellos pequenos. «Eu creo que en concellos pequenos en orzamento, coma Moeche, pero grandes en ilusión, en fe, en querer trasladarlle músculo e vitalidade á súa cidadanía e aos seus sectores económicos, merecen sempre o apoio da Deputación», afirmou.

Regueira puxo tamén en valor o esforzo do Concello por consolidar unha cita que, segundo subliñou, «vai alén da propia feira» e ten repercusión na produción agrogandeira e na hostalaría da comarca. Neste sentido, lembrou que a Deputación leva anos apoiando esta iniciativa e que nesta edición se reforza a colaboración coa presenza do Mercado da Deputación, que permite sumar a outros produtores da provincia e contribuír a ampliar o impacto do evento.

O vicepresidente destacou ademais a boa acollida que está a ter o Mercado da Deputación na súa primeira participación na Feira do Queixo de Moeche. Explicou que «xa desde primeiras horas da xornada» se percibía un ambiente moi animado ao redor dos postos. «Hai moita xente comprando, todo o mundo está moi contento por esta afluencia de público», sinalou. Segundo Regueira, está sendo «fantástica e moi positiva» esta primeira experiencia en Moeche e avanzou que a intención da Deputación é repetir o formato o vindeiro ano.

O tamén deputado de Turismo e Promoción Económica salientou tamén o valor da feira como punto de encontro para produtoras e produtores da provincia. Segundo explicou, ademais dos participantes no Mercado da Deputación, outros produtores están a achegarse para coñecer como poden incorporarse ao ecosistema de empresas da marca ‘A paisaxe que sabe’, «con todo o positivo que significa para a nosa marca», apuntou.

O vicepresidente incidiu tamén no potencial da feira como espazo de contacto directo co público. «É un evento con moito potencial, sobre todo de consumidor final, distinto a outros aos que imos para abrir vías para as canles de distribución», indicou. Neste sentido, subliñou que este tipo de encontros tamén contribúen a achegar á cidadanía os produtos locais. «É importante para popularizar o produto de altísima calidade que temos entre a sociedade; un produto de quilómetro cero, sostíbel, non só para comer mellor, senón tamén para protexer o noso sistema produtivo e o planeta», afirmou.

Pola súa banda, a deputada provincial de Plans Provinciais e concelleira de Desenvolvemento Local de Moeche, Cristina García Rey, destacou o potencial do recinto feiral da localidade e o peso que ten o sector primario na economía do municipio. «Somos un concello pequeno e rural, cunha forte presenza do sector primario, e ademais temos a sorte de contar cun recinto feiral moi amplo e con moitas posibilidades. Por iso tratamos de aproveitalo ao máximo para organizar iniciativas coma esta feira, que poñen en valor os nosos produtos e dinamizan a vida económica e social do concello», sinalou.

A Feira do Queixo de Moeche reúne durante toda a fin de semana postos de venda de queixos e produtos artesáns, actividades culturais e propostas gastronómicas arredor dun produto emblemático da comarca.

O presidente da Deputación da Coruña, Xosé Regueira, participou este martes na presentación da VIII Feira do Queixo de Moeche, que terá lugar o próximo domingo, 15 de marzo. No acto estivo acompañado pola deputada de Plans Provinciais, Cristina García —concelleira no municipio—, e pola alcaldesa, Beatriz Bascoy. Na súa intervención, salientou o papel destes eventos na dinamización económica e social do territorio, especialmente en concellos de pequeno tamaño, con influencia tanto na produción agrogandeira como na hostalaría.

«Eu creo que en concellos pequenos en orzamento, coma Moeche, pero grandes en ilusión, en fe, en querer trasladarlle músculo e vitalidade á súa cidadanía e aos seus sectores económicos, merecen sempre o apoio da Deputación», insistiu o vicepresidente da Deputación.

Xosé Regueira puxo en valor o esforzo do Concello por consolidar ao longo dos anos unha cita que, segundo subliñou, ten un impacto que vai máis alá da propia feira. «Hai concellos que teñen enormes orzamentos, pero que non son capaces de emprender ou que non se atreven a emprender retos como o que emprende o concello de Moeche mantendo cada ano unha Feira do Queixo tan importante coma esta, mellorando en cada edición», afirmou.

Apoio da Deputación da Coruña

O vicepresidente lembrou que a Deputación leva anos apoiando a feira e que nesta edición se dá «un paso máis». Neste sentido, indicou que «a Deputación leva apoiando esta feira desde hai moito tempo, e este ano damos un pasiño máis, pois ademais do apoio económico a través da liña de subvencións, pedímoslle ao Concello a posibilidade de estar na feira co noso mercado de artesanía agroalimentaria».

Esta iniciativa permitirá, na súa opinión, que outros produtores da provincia participen e coñezan de primeira man o funcionamento dun evento que se consolidou como referente ao redor do queixo e doutros produtos de calidade. O vicepresidente engadiu que «a feira está escalando e a Deputación o que vai intentar é darlle, ademais, soporte ao resto da cadea de valor da enogastronomía que traballa habitualmente connosco, para que se sirva tamén da cantidade de xente que se vai achegar durante estas dúas xornadas ao recinto feiral de Moeche».

Variada programación

A programación desenvolverase durante toda a fin de semana con propostas para todos os públicos. Haberá postos de venda de queixos e produtos artesáns, actuacións musicais, obradoiros, catas comentadas, actividades infantís, visitas guiadas e sorteos de produtos. No espazo do Mercado da Deputación organizaranse tamén varias mostras de cociña a cargo do chef Adnré Azúa —ás 11:30, 12:30 e 13:30 horas—. Ademais, o grupo De Ninghures oferecerá un concerto, tamén financiado pola Deputación, ás 19:30.

O vicepresidente da Deputación da Coruña, Xosé Regueira, e a deputada Avia Veira, representaron este venres a administración provincial dos actos institucionais celebrados no marco da feira BioCultura 2026: a propia inauguración do evento, pola mañá, e unha entrega de diplomas á tarde.

Nacto de recoñecemento e entrega de diplomas ás novas empresas turísticas certificadas na Marca de Calidade da Reserva da Biosfera Mariñas Coruñesas, o vicepresidente defendeu «un turismo ‘slow’ a longo prazo, que xere oportunidades, e pense primeiro na paisaxe e nas persoas que viven no territorio». Un modelo, para Regueira, que comparten a Deputación e a Reserva, «exemplo de boa gobernanza, do camiño que temos que seguir».

Regueira referiuse á eclipse de sol do 12 de agosto, protagonista este ano do programa de Turismo da Deputación en Fitur, «onde a nosa presentación demostrou que é punteira e que é vangarda». «Na feira madrileña», engadiu, puidemos comprobar como todas as administracións públicas nos preocupábamos por un fenómeno que se vai presenciar unha única vez na vida de unha persoa, pero que vai significar unha marea de visitantes que van querer achegarse aos nosos destinos, sobre todo aos Starlight ou á Reserva da Biosfera».

Fixo tamén mención Regueira «á paisaxe, a enogastronía e a xente que vive na paisaxe da provincia da Coruña» como «elementos que identifican a aposta de Turismo da Deputación desde a saída da COVID». «Eu creo», abundou, «que o noso verdadeiro Silicon Valley, a verdadeira industria da provincia da Coruña, pero tamén de Galiza, é a nosa enogastronía, producir alimentos de altísimas calidades, viño e todo tipo de alimentos, e ser punteiros e vangarda tamén a nivel internacional».

Rematou o vicepresidente a súa intervención reafirmando a sintonía da Deputación coa Reserva da Biosfera: «sabemos valorar a xente que vive da paisaxe e  sabemos que temos que coidar para que esa paisaxe siga sendo unha paisaxe produtiva durante moitísimos anos máis».

Modelo ecolóxico

Na xornada matinal, Avia Veira compartiu intervencións, na xornada de mañá, coa directora de Promoción da Axencia de Turismo de Galiza; Martín Alemparte, o director da Axencia Galega da Calidade Alimentaria (AGACAL); con José Antonio Santiso Miramontes, presidente da Reserva da Biosfera Mariñas Coruñesas, e co concelleiro de Cultura e Turismo da Coruña, Gonzalo Castro.

O apoio da Deputación este ano á feira é, segundo Veira, «unha aposta máis pola difusión do bo facer dos produtores e das produtoras da provincia da Coruña, das persoas que producides e transformades o boísimo produto que sae da nosa terra e do noso mar». «Pero non é unha aposta máis, senón reafirmada neste ano de incertezas e de dificultades derivadas do asinamento do acordo entre a Unión Europea e o Mercosur; por iso o noso apoio a vosa visibilidade é máis importante que nunca».

O acordo presenta para a agricultura ecolóxica galega, segundo a deputada, «moitas ameazas, porque o noso sector, o modelo ecolóxico galego, de pequena explotación familiar, razas autóctonas, pastoreo e de estándares rigorosos está en posición especialmente vulnerábel fronte a un modelo agroindustrial de grande escala e con menores exixencias ambientais e laborais».

A única saída viábel a esa situación pasa, segundo Veira, «por reforzar a diferenciación por calidade, orixe e certificación ecolóxica ante o consumidor». Nese esforzo, afirmou, «os produtores e produtoras da nosa provincia terán como aliada á área de Turismo e Cadea Agroalimentaria da Deputación da Coruña».

A caer o 8M, fixo referencia ás mulleres produtoras, «as que transformades os produtos, as que recuperades receitas e maneiras de facer tradicionais, as que innovades día a día malia os retos e dificultades nos accesos a titularidades das terras, na representación nos órganos de decisión ou das dificultades para conciliar o traballo». «Desde a Deputación da Coruña», rematou, «queremos darvos as grazas ás que co voso esforzo contribuídes ao coidado da terra e ao noso desenvolvemento económico».

A Deputación da Coruña participou hoxe na inauguración oficial da 51.ª Festa do Queixo de Arzúa, unha das citas gastronómicas máis consolidadas de Galiza, reafirmando o seu apoio aos eventos que contribúen á valorización do produto local, ao impulso económico do rural e á promoción turística da provincia. O acto institucional, celebrado na carpa instalada no Campo da Feira, incluíu a entrega do premio do concurso de tapas e petiscos, a homenaxe ás mulleres e aos homes da migración, as intervencións das autoridades e un pregón a cargo do actor Federico Pérez.

O vicepresidente da Deputación da Coruña, Xosé Regueira, destacou que a Festa do Queixo «representa moitísimas máis cousas ca unha simple festa», situándoa no corazón produtivo do país. Defendeu que Galiza ten na produción alimentaria de alta calidade unha das súas grandes fortalezas e apelou á responsabilidade das administracións públicas na súa protección.

O tamén deputado de Turismo e Promoción Económica subliñou que «o noso verdadeiro Silicon Valley é toda a xente que ao longo e ao largo do noso país é capaz, con moitos esforzos, de producir alimentos de altísima calidade», afirmou, reivindicando o papel das explotacións gandeiras e das queixarías como referencia internacional. Regueira expresou ademais o desexo de que esta 51.ª edición sexa unha oportunidade de negocio para o sector e unha celebración dunha comarca viva, convidando tamén a visitar o Mercado da Deputación, presente no recinto feiral.

A deputada de Plans, Cristina García Rey, puxo o acento na traxectoria da celebración, asegurando que «cincuenta e un non é un número calquera», senón a constatación de que cando existe un produto auténtico e unha comunidade que cre no que fai «non fan falta modas nin artificios».

García Rey destacou especialmente o papel das queixeiras e queixeiros, convertendo o coñecemento herdado en excelencia, e subliñou que o produto de proximidade constitúe unha garantía fronte ás importacións. Neste sentido, trasladou o compromiso da Deputación co sector, asegurando que o seu traballo «é visíbel, é valioso e conta co noso apoio».

Pola súa parte, o alcalde de Arzúa reivindicou a constancia colectiva como clave no máis de medio cento de edicións da festa. Xoán Xesús Carril afirmou que esta celebración se explica pola constancia dun pobo que soubo converter o seu traballo diario nun símbolo colectivo, defendendo que o queixo Arzúa-Ulloa representa un modelo de desenvolvemento ligado á calidade, á proximidade e ao respecto pola contorna. «A Festa do Queixo é proba de que cando un pobo cre en si mesmo é imparábel», sentenciou o rexedor local.

Mercado da Deputación de ‘A paisaxe que sabe’

A Deputación da Coruña colabora un ano máis coa Festa do Queixo a través da marca gastronómica provincial ‘A paisaxe que sabe’, cun espazo propio no Mercado da Deputación e coa organización de demostracións culinarias ao longo da fin de semana, reforzando a conexión entre gastronomía, territorio e promoción económica.

A institución provincial subliña o papel da Festa do Queixo como escaparate da Denominación de Orixe Protexida Arzúa-Ulloa e como motor de dinamización social, cultural e económica da comarca e do conxunto da provincia.

A Deputación da Coruña despide hoxe a súa participación en HIP–Horeca Professional Expo con evidente satisfacción tras tres xornadas de intensa actividade no posto provincial baixo o lema ‘A paisaxe que sabe’. Este ano foi a primeira participación da institución nesta feira profesional, que tivo lugar no IFEMA madrileño, e onde se sucederon demostracións culinarias, presentacións de produto e obradoiros de harmonías que puxeron en valor a cadea de valor enogastronómica da provincia.

O vicepresidente e deputado de Turismo e Promoción Económica, Xosé Regueira, subliña que «a valoración que facemos da nosa participación neste evento é claramente positiva». Neste sentido, destaca que «así o indican tanto a afluencia ao noso posto, como o interese amosado polo público e as propias impresións do sector enogastronómico que nos acompañou nestes tres días».

Regueira incide no perfil profesional das persoas asistentes e asegura que «a xente que se achega a nós son visitantes profesionais, son persoas interesadas en abrir vías de negocio. Coa calidade do produto que temos e co sector tan altamente profesional como hai na provincia da Coruña, coido que o éxito está asegurado». O vicepresidente engade que agora cómpre dar unha marxe de tempo, polo menos dun mes ou mes e medio, para comprobar se os contactos establecidos se traducen en oportunidades reais de mercado.

A xornada de hoxe estivo protagonizada polos dous obradoiros ofrecidos polo chef carballés Adrián Felípez, á fronte do restaurante Miga (A Coruña). O cociñeiro elaborou unha terrina de cacheira de porco celta con guiso de grelos e caldo de cocido, así como unha albacora curada en auga de mar, sopa de xunco mariño e folla de ostra, propostas que volveron atraer numeroso público profesional ao posto da Deputación.

Entre ambas as demostracións, o sumiller Alejandro Paadín conduciu un obradoiro de harmonías centrado nos viños da subzona Ribeiras Coruñesas do Ulla da denominación de orixe Rías Baixas, acompañados de queixo Galmesán (Arzúa) e patacas fritidas Bonilla a la Vista (A Coruña). A despedida do evento completouse coa presentación e degustación de mexillón afumado da Conserveira (Ribeira), maridado con Vermut Lodeiros (Santiago).

Ao longo dos tres días participaron restaurantes de referencia como Illas Gabeiras, de Ferrol; As Garzas, de Barizo, en Malpica de Bergantiños; e o xa mencionado Miga, que amosaron a capacidade creativa da cociña atlántica e a reinterpretación contemporánea do produto de proximidade. Xunto a eles, produtores e comercializadores de diferentes comarcas contribuíron a ofrecer unha visión ampla e diversa do potencial enogastronómico coruñés.

Empresas como Martietas de Fío, de Bergondo; Empanadas Ternura, da Coruña; La Despensa D’Lujo, de Coristanco; A Conserveira, de Ribeira; Cien por Cel e Vermut Lodeiros, de Santiago de Compostela; Galmesán, de Arzúa; ou Bonilla a la Vista, da Coruña, participaron nas distintas sesións.

Con esta primeira participación en HIP, a Deputación da Coruña consolida a súa aposta pola promoción conxunta do produto, da transformación e da restauración baixo unha estratexia común de marca, proxectando a imaxe dunha provincia que combina excelencia, identidade territorial e capacidade empresarial para competir nos mercados profesionais.

O Teatro da Beneficencia de Ortigueira acolleu este martes o acto de lanzamento do Plan de mellora e acreditación de empresas turísticas do Xeoparque Cabo Ortegal. A encargada de presentar a iniciativa foi a deputada de Plans Provinciais e Asistencia a Concellos da Deputación da Coruña, Cristina García, quen lembrou que a finalidade é reforzar a sostibilidade e o vínculo das entidades locais co Xeoparque, mediante un sistema voluntario de adhesión e acreditación.

Vai dirixido tanto a empresas turísticas coma a produtores do sector primario e artesáns que oferten algún tipo de actividade turística nos sete municipios que abrangue: Cariño, Cedeira, Cerdido, Moeche, San Sadurniño, Ortigueira, Valdoviño. Inclúe accións formativas, asistencia técnica individualizada e un plan de mellora a curto e medio prazo para que as entidades participantes poidan obter a acreditación do Xeoparque.

No acto de hoxe explicouse o funcionamento do modelo e anunciouse a apertura do proceso de adhesión ao sistema de acreditación. Tamén se detallaron os requisitos de acceso e os criterios básicos que deberán cumprir as empresas interesadas, co obxectivo de que o empresariado coñeza con claridade os compromisos que asumirían en materia de competitividade, dixitalización, sostibilidade e calidade.

Prazo aberto até o 8 de febreiro

O prazo para solicitar a incorporación permanecerá aberto até o próximo 8 de febreiro. No vindeiro mes de abril entregaranse as acreditacións a todas aquelas empresas que superen o proceso de adhesión.

Esta actuación está promovida pola Deputación Provincial da Coruña, en colaboración coa Asociación para a Xestión do Xeoparque Cabo Ortegal, ao abeiro do Plan de sostibilidade turística en destino (PSTD) do Xeoparque Cabo Ortegal. Conta, ademais, con financiamento de fondos europeos NextGenerationEU, a través do Plan de Recuperación, Transformación e Resiliencia.

A Deputación da Coruña iniciou este luns a súa participación en Madrid Fusión 2026 cunha intensa primeira xornada de actividade no seu espazo expositivo do pavillón 14 de IFEMA e ao redor do lema ‘A paisaxe que sabe’. Os grandes protagonistas foron os produtos «de primeira calidade» da provincia, «tratados co máximo mimo e coñecementos por profesionais expertos», subliñou o vicepresidente, Xosé Regueira.

O tamén deputado de Promoción Económica destacou a importancia de manter a presenza por cuarto ano consecutivo neste evento, o maior escaparate profesional do Estado, onde está presente o conxunto da cadea de valor da gastronomía da provincia da Coruña.

Ao longo do día sucedéronse presentacións e degustacións que permitiron afondar na calidade, orixe e usos dos distintos produtos, tanto do mar como da terra. A expectación ante algunhas das actividades ou propostas foi notábel, incluso formándose importantes ringleiras de persoas nalgúns momentos.

A xornada abriu coa presentación das Gallegas de Nata da Coruña e continuou coa Fabada Galaica de La Despensa D’Lujo de Coristanco, elaborada con compango de porco celta e acompañada, na súa suxestión de presentación, de pan de broa de millo corvo. Esta combinación serviu para achegar física e gastronomicamente dous alimentos tradicionalmente vinculados tamén no cultivo, xa que a planta da faba trepa polo millo.

Outro dos momentos destacados foi a presentación da ventresca de bonito do norte da Conserveira, elaborada con manteiga de Galmesán. Desde ambas empresas salientouse a súa relación de colaboración ao longo de anos, así como o uso neste prato dun subproduto da elaboración do queixo ao que se lle dá valor e un novo aproveitamento culinario.

A cociña en directo tivo un papel central coa dobre participación de Fabián Mouzo e Lara Alvarellos, do restaurante O Camiño Fala de Mazaricos, que elaborou callos ao estilo de Carnés e albóndegas de atún en salsa verde. Na primeira das súas demostracións, as longa ringleira de persoas dispostas a probar o prato acabaron en poucos minutos coas racións dispoñíbeis.

Mouzo e Alvarellos reivindicaron a cociña tradicional, «de avoa», para tratar os «excelentes produtos» desta terra, ao tepmo que cualificaron a riqueza do Atlántico como unha auténtica despensa «de luxo».

A seguir, relatorio e cata a cargo do catador e formador Alejandro Paadín, centrados na Indicación Xeográfica Protexida Betanzos. Paadín abordou o concepto de terroir, entendido como a interacción entre clima, solo, variedades e cultura, aplicado ao territorio da Reserva de Biosfera das Mariñas Coruñesas e Terras do Mandeo, e repasou a traxectoria dos viños de Betanzos, algúns deles recoñecidos con diversas distincións. A actividade incluíu a degustación dunha selección de viños que exemplifican o bo facer vitivinícola da zona.

A xornada pechará esta tarde coa presentación e degustación dos produtos de Chichalovers de Santiago de Compostela, nun primeiro día de feira marcado pola actividade continuada e pola diversidade de propostas gastronómicas.

A programación da Deputación da Coruña continuará o martes e o mércores con novas demostracións culinarias, relatorios e presentacións dentro da súa estratexia de promoción turística e económica baseada no produto, no talento profesional e no territorio.